白话广州
早几日系“3.15”消费权益日，小弟跟尾讲一下自己遇到嘅一单消费纠纷。
好几年前嘅某日，小弟同几个老友去到番禺南浦一家农庄食饭。
嚟得农庄梗系食啲用土法整嘅嘢嘎啦，于是就点咗个竹筒饭。
落单之后，小弟脑海里开始浮现：青绿嘅竹筒，俾火烧到哔哩叭啦响，之后剥开竹筒，融入咗竹香嘅饭香扑面而来……
“借借，上竹筒饭啦！”服务员嘅嗌声，将小弟带返落地球。
只见眼前一物：一个碗口粗、约30公分长已泛黄嘅“陈年”竹筒，上面有个装咗两只门铰嘅盖，打开盖，里面系饭。
“靓姐，呢啲叫竹筒饭咩？竹筒饭系用新鲜嘅竹……”
“唔系啊，我哋嘅竹筒饭系讲用竹筒装住啲饭蒸熟，竹筒系餐具。”
“唔系嘛？”
“系啊，铜盘蒸鸡都系讲用个铜盘装住只鸡蒸嘎啦”。
咁呢个竹筒……”
“都话系餐具啰，洗净再用”。
“我顶，咁都得！嗌你老细嚟……”
据理力争之下，农庄最后打咗个九折收费，我哋见执返个尾彩亦就息事宁人。
睇嚟，竹筒饭都要定个产品标准。◎阿六律师
热门
